VI Xornadas de Innovación Docente. Valoracións e resultados

Un ano máis queremos compartir con vós os resultados dunha nova edición das Xornadas de Innovación Docente organizadas polo Cufie co apoio da Vicerreitoría de Planificación Académica e Innovación Docente.

A sesión presencial desta edición celebrámola o día 20 de maio de 2022 baixo o lema Contextos universitarios transformadores: a innovación como eixo vertebrador da docencia. Velaquí un percorrido polas distintas actividades realizadas:

A participación

De acordo coas preferencias que manifestastes nas valoracións da edición anterior, nesta ocasión optamos polo formato híbrido. Mantivemos a participación docente en formato vídeo-comunicación que tan ben funcionou na edición pasada pero, dado que a situación sanitaria mellorou considerablemente, quixemos favorecer o reencontro presencial na facultade de CC. da Educación para volver a vernos as caras e compartir sensacións e experiencias. Así foi como o día 20 nos volvimos a encontrar para asistir ao relatorio plenario, aos obradoiros prácticos e á entrega de premios.

Esta foi a secuencia temporal desta edición:

Nesta ocasión inscribíronse 193 persoas e presentáronse un total de 54 vídeo-comunicacións. Ambas cifras están case á par coas da edición anterior, sen embargo temos que dicir que o formato híbrido non favoreceu a asistencia na mesma medida, pois asistiron aproximadamente a metade das persoas inscritas. Na edición anterior en cambio, mantívose constante a asistencia ao longo dos dous días celebrados en modalidade virtual.

A homenaxe

Durante o acto de inauguración das xornadas a cargo das autoridades académicas, tivo lugar unha homenaxe moi emotiva para todo o equipo do Cufie dedicada ao noso anterior director: o profesor Enrique de la Torre. Para nós Enrique foi un pilar fundamental ao longo de todos estes anos e sen el nunca chegaríamos a ser o equipo consolidado que somos a día de hoxe. Por iso, esta merecida homenaxe por parte do reitor e da vicerreitora Nancy Vázquez en recoñecemento á súa labor, foi especialmente emotiva para nós.

O relatorio plenario

Levábamos tres anos intentando traer a un convidado moi especial e por fin lográmolo para esta edición: o noso relator convidado foi nada menos que o profesor Alfredo Corell Almuzara, catedrático de inmunoloxía e coñecido divulgador televisivo. Corell acadou moita sona por mor da pandemia grazas aos seus coñecementos sobre o virus da Covid-19, pero para nós tiña especial interese a súa faceta como educador, que lle reportou numerosos premios nacionais e internacionais.

Como era de agardar, non defraudou e compartiu con nós moitas das iniciativas que levou a cabo desde as aulas da Universidade de Valladolid, e tamén algunha que outra interesante anécdota.

Deixámosvos a gravación da súa conferencia para que non perdades detalle:

Os obradoiros

Para impartir os obradoiros prácticos, este ano optamos por lanzar ao noso PDI unha convocatoria de propostas da que resultaron moitas ideas interesantes. O límite no orzamento obrigounos a seleccionar 5, pero agardamos repetir convocatoria o ano que vén porque pensamos que foi un éxito. Estes foron os 5 obradoiros que se impartiron:

1. Como crear un entorno persoal de aprendizaxe. Da teoría á práctica. Víctor Arufe Giráldez
2. Design Thinking como metodoloxía docente. Elena Arce Fariña
3. Planificación e seguimento dos traballos académicos TFG/TFM: Unha proposta de mellora. Susana Rodríguez Martínez
4. Traballo en equipo: o proceso si que importa. Cristina Anido Martínez
5. A importancia do relato para materias con impacto: aplicación da metodoloxía Aprendizaxe-Servizo. Isabel Novo Corti e María Cendán Castillo.

Isabel Novo e María Cendán

Cristina Anido

Susana Rodríguez

Víctor Arufe

Elena Arce

Os premios

A boa acollida da edición pasada levounos a convocar a 2ª edición dos premios “Mellor experiencia docente”. Nesta ocasión, contamos co patrocinio de tres cátedras da UDC que achegaron financiación para outorgar os galardóns, concretamente unha tablet de alta gama por cada premio:

• Dous premios á “Mellor experiencia docente 2022” patrocinados pola Cátedra Vegalsa-Eroski de Compromiso social, Comunicación e Reputación corporativa  e pola Cátedra R en Ciberseguridade.
• Un premio especial “Mellor experiencia docente 2022 en materia de atención á diversidade ” patrocinado pola  Cátedra NNTT Data en Diversidade e Tecnoloxía

O xurado estivo formado polos directores das cátedras e por dous profesores en representación das outras dúas universidades galegas, que se enfrontaron ao difícil reto de decidir entre as 10 propostas máis valoradas na fase de votación do público:

• Alexandre Sotelino Losada. Profesor da USC. Membro do grupo de Investigación ESCULCA.
• Jorge Soto Carballo. Vicerreitor do Campus de Pontevedra da UVIGO e Doutor en CC. da Educación.
• Carmen Costa Sánchez. Directora da Cátedra Vegalsa-Eroski de Compromiso social, Comunicación e Reputación corporativa
• Luis Hervella Nieto. Director da Cátedra NNTT Data en Diversidade e Tecnoloxía
• José Carlos Dafonte Vázquez. Director da Cátedra R de Ciberseguridade

Finalmente as experiencias premiadas foron:

• Uso de Instagram como ferramenta docente da materia de Ortopodoloxía Clínica do Grao en Podoloxía. Fátima Santalla Borreiros, Manuel Romero Soto, Sergio Pérez García e Pedro Gil Manso. Patrocinado pola Cátedra Vegalsa-Eroski de Compromiso social, Comunicación e Reputación corporativa
• Proxecto Soka. Música e teatro para a toma de conciencia  sobre a violencia escolar. Rocío Chao Fernández, Aurelio Chao Fernández e Francisco C. Rosa Napal. Patrocinado pola Cátedra R de Ciberseguridade. 
• Premio especial en materia de Atención á diversidade: Bibliodiversidade sonora. APS para a educación en diversidade afectivo sexual. Teresa Piñeiro Otero, Renèe de Palma Úngaro e Ana María Amigo Ventureira. Patrocinado pola Cátedra NNTT Data en Diversidade de Tecnoloxía. 

Rocío Chao

Teresa Piñeiro

Fátima Santalla

Podes ver en vídeo a entrega de premios nesta ligazón.

As valoracións

A vicerreitora Nancy Vázquez facía alusión na súa presentación das xornadas á importancia de darlle pulo á calidade da docencia para poñela á par da carreira investigadora, posto que ambas facetas son igual de relevantes e trascendentes para as institucións académicas.

Coidamos que estas xornadas son unha importante contribución ao logro dese obxectivo, e así nolo deixades ver a través dos resultados das vosas valoracións.

Coma cada edición, queremos darvos as grazas polos vosos comentarios e pola vosa participación. Agardámosvos a todo/as o ano que vén.

Velaquí os resultados das vosas valoracións:

valoracions-vi-xidDescarga\t

E despedímonos ata a próxima con un vídeo-resumo das VI Xornadas:

“El CUFIE como motor de cambio y de actualización permanente en la UDC”

Este foi o título elixido para a conferencia que impartimos o pasado xoves 24 de febreiro na Escuela Nacional de Estudios Superiores de León, pertencente á Universidad Autónoma de México.

Fomos convidados polos nosos homólogos do LIDIE (Laboratorio Interdisciplinario para la Docencia e Innovación Educativa), que é un centro moi similar ao noso alí. O LIDIE amosou moito interese por coñecer como nos organizamos e sobre todo, interesáronse polas actividades de fomento da inclusión educativa e da innovación docente.

Na exposición participamos o noso director, José A. García Naya e os tres técnicos do CUFIE: Sonia Seijas, David Fociños e Ana Peña.

O evento emitiuse por Zoom e por FacebookLive ao mesmo tempo, superando os 250 espectadores entre ambos canais. Foi pois unha excelente ocasión para dar a coñecer fóra das nosas fronteiras a nosa universidade e o traballo que desenvolvemos aquí.

Confiamos en que ademáis, esta participación sexa o xerme de unha fructífera colaboración entre as dúas institucións.

Gustaríavos ver a presentación que empregamos para a nosa exposición? Facendo clic Aquí ou na imaxe inferior podedes visualizala.

Esperamos que vos guste. Dádenos feedback nos comentarios!

Remata o 2021. Benvido 2022

Nin nos demos conta pero xa estamos a rematar outro ano máis e, coma sempre, quixemos despedilo felicitándovos o nadal e facendo reconto das actividades que fomos desenvolvendo.

Para felicitar estas festas, escollimos un lema significativo deste ano de transición cara a nova normalidade: Que cousas che gustaría recuperar no 2022? Adiante vídeo!, esperamos que vos guste:

Programas formativos

Durante o 2021, todos os nosos planos formativos continuaron impartíndose en formato virtual para garantir a saúde de profesorado e alumnado. Como novidade, sumamos unha nova colaboración coa Oficina para a Igualdade de Xénero da UDC coa que desenvolvimos o Plano de Formación en Igualdade (PFOIX) destinado tanto a profesorado como a alumnado.

Polo demáis, continuamos coa formación en Software Libre e coa colaboración co Servizo de Bibliotecas da UDC.

Eventos, xornadas e congresos

Comezamos o ano colaborando co grupo de investigación Esculca da Universidade de Santiago na organización do III Simposio Internacional de Aprendizaxe-Servizo na Universidade. Neste Simposio participaron dúas profesoras da UDC dando a coñecer os seus proxectos de ApS: Teresa Piñeiro e Ana Ares

Exposicións de Ana Ares e de Teresa Piñeiro

No mes de maio organizamos as V Xornadas de Innovación Docente baixo o lema A nova normalidade académica: leccións aprendidas e retos de futuro. Inscribíronse máis de 200 docentes da UDC que compartiron as súas experiencias de adaptación da docencia ao medio virtual en formato de vídeo-pílulas explicativas. Tivemos tamén conferencias, mesas redondas e obradoiros sobre deseño de materiais accesibles, avaliación, guión audiovisual e dinamización de clases síncronas que foron moi ben valorados polos participantes.

Algúns momentos das Xornadas

No mes de xullo asistimos ao IV Congreso Internacional de Aprendizaxe Servizo Universitario que se celebrou en Canarias en formato virtual. Nese importante foro demos a coñecer o intenso traballo dos nosos docentes e tamén o noso propio coa comunicación: El ApS en la Universidade da Coruña: proceso de institucionalización y su contribución al logro de los ODS.

Divulgando o noso traballo

En setembro estreamos curso organizando as nosas III Xornadas de Aprendizaxe e Servizo nas que contamos con importantes conferenciantes de distintas universidades nacionais, mesas redondas e obradoiros:

Tamén no mes de setembro, organizamos unhas interesantes xornadas para dar a coñecer o Plano de Acción Titorial (PAT) que se celebraron na Facultade de CC. da Educación:

Cartaz das xornadas do PAT

No mes de outubro participamos no V Congreso Internacional Universidad y Discapacidad organizado pola fundación Once e pola Universidade de Salamanca dando a coñecer o traballo da Rede Sapdu (completar)

Sonia Seijas falando do traballo da ADI

Premios

Durante este ano fixemos dúas convocatorias de premios á innovación docente:

• II Convocatoria de premios á Innovación Docente en Aprendizaxe-Servizo. Nesta edición, puidemos entregar 6 premios divididos en tres liñas temáticas: Sustentabilidade, Atención á diversidade e Redución das desigualdades.

Docentes premiado/as na II edición dos premios APS

• Premios “Mellor experiencia docente”: no marco das V Xornadas de Innovación Docente, entregáronse dous premios e un accésit ás mellores experiencias docentes. As gañadoras foron:
  • 1º premio: “Nonna, mi racconti…”: historias de una influencer nonagenaria en el aprendizaje del italiano de Emiliana Tucci. Ver vídeo da experiencia
  • 2º premio: A Universidade Sénior: Derribando barreiras e estereotipos en tempos de COVID de Ana I. Ares Pernas, Susana Iglesias Antelo e Matilde García Sánchez. Ver vídeo da experiencia
  • Accésit: Metodologías activas en la formación inicial del profesorado en orientación, tutoría y diagnóstico de Nuria Rebollo Quintela, Paula Mendiri Ruíz de Alda e Luisa Losada Puente. Ver vídeo da experiencia

Cartaz dos premios a Mellor experiencia docente

Cursos MOOC

Durante os primeiros meses do ano traballamos arreo para ter listos os 3 cursos MOOC que estreamos en maio na plataforma MiríadaX: Teoría de juegos para el desarrollo sostenible, Mentoría en la Universidad: formación de las figuras implicadas e Construcción naval e Industria 4.0. Ademais, impartíronse no mes de marzo as terceiras edicións de dous cursos exitosos: Tecnología para la participación activa en diversidad funcional e Sostenibilidad y Big Data.

• 

• 

• 

• 

• 

Proxectos europeos

Definitivamente, este foi o ano dos proxectos europeos e desde o Cufie quixemos aproveitar a oportunidade sumándonos a varios proxectos moi interesantes. De momento, podemos falarvos de un deles: O proxecto HERIT

Trátase dun proxecto financiado polo programa Erasmus+ que ten como obxectivo apoiar e impulsar a preparación en materia de educación dixital dos/ as propietarios/ as de casas históricas. Por parte da UDC participamos xunto con un grupo de investigadores do CITIC dirixidos por Laura Nieto Riveiro e co Grupo de Estudos Territoriais (GET).

Publicacións

Ao longo deste ano, editamos dúas publicacións dixitais con ISBN e DOI aloxadas no noso repositorio institucional:

• Guía de boas prácticas en Aprendizaxe e Servizo na Universidade da Coruña (vol.2)
• Contextos universitarios transformadores: a nova normalidade académica. Leccións aprendidas e retos de futuro. V Xornadas de Innovación Docente

Seguramente nos quedan cousas por listar aquí, pero como resumo esperamos que sirva.

Agora vimos decididos a afrontar este novo ano con moita enerxía para emprender novos proxectos e para continuar ofrecéndovos a mellor atención. Ogallá que o 2022 sexa o ano da volta á normalidade e do regreso de todo o que perdimos.

Coñecendo ás protagonistas dos premios a “Mellor experiencia docente”

Seguro que lembrades que o pasado mes de maio entregamos dous premios e un accésit a “Mellor experiencia docente” no marco das V Xornadas de Innovación Docente.

Desde a Unidade de Teleformación do CUFIE, quixemos saber un pouco máis sobre esas tres experiencias, así que collimos a cámara e o equipo e alá nos fumos ás tres facultades correspondentes para entrevistar ás súas protagonistas e que nos contaran de primeira man os detalles do traballo que desenvolveron.

O resultado foron varias horas de gravación que tentamos resumir en tres pequenos vídeos. Pensamos que o resultado permite facerse unha idea máis clara dos interesantísimos proxectos que se levaron a cabo. Agardamos que vos gusten!

1º PREMIO: Nonna mi raconti: Historias dunha influencer nonaxenaria na aprendizaxe do italiano

2º PREMIO: A Universidade Sénior: Derribando barreiras e estereotipos en tempos de COVID

ACCÉSIT: Metodoloxías activas na formación inicial do profesorado en orientación, titoría e diagnóstico

V Xornadas de Innovación Docente. Valoracións e resultados

Os pasados 27 e 28 de maio celebramos en formato virtual as V das Xornadas de Innovación Docente e, coma todos os anos, queremos compartir con vós os resultados e impresións.

Esta edición tan especial, celebrada baixo o lema A nova normalidade académica: leccións aprendidas e retos de futuro, tivo unha acollida que nos sorprendeu gratamente. Pero vexamos os datos antes de sacar conclusións:

O programa

A organización do programa supuxo un reto importante debido á falta de presencialidade. A nosa intención foi dar o maior protagonismo posible ás persoas participantes. É por iso que tan só houbo un relatorio plenario, mentras que o resto do tempo repartiuse de xeito que se outorgase un papel activo aos asistentes mediante mesas de debate, obradoiros prácticos e vídeo-comunicacións.

A secuencia temporal destas xornadas foi novidosa tamén, pois tivo unha fase asíncrona durante a cal se elaboraron, compartiron, visualizaron e votaron as achegas en formato vídeo-comunicación e unha fase síncrona durante as mañáns dos días 27 e 28 para o desenvolvemento dos distintos eventos do programa.

A participación

Esta edición resultou ser unha das máis numerosas en canto a participación e asistencia, con un total de 216 persoas inscritas e de 60 video-comunicacións presentadas. Cabe destacar ademais que a asistencia se mantivo constante ao longo dos dous días mesmo ata o venres a última hora, cousa que non ocorría no formato presencial.

Datos de participación V XID

O relatorio plenario

O relatorio plenario, baixo o título “Claves de la docencia en tiempos de pandemia y retos de futuro”, estivo a cargo da directora de Deusto Online, Sonia Arranz Turnes quen, como era de agardar, non defraudou.

Tal como recolle a gráfica anterior, foi a que acadou maior grao de participación e tanto a charla en si mesma coma o debate xurdido despois foron moi enriquecedores. Sonia achegounos valiosos consellos e recursos para o exercicio da docencia e da aprendizaxe en medios telemáticos.

Deixámosvos aquí a gravación da súa intervención por se queredes tomar nota dos seus interesantes consellos:

A mesa redonda

Logo do relatorio, celebrouse unha mesa redonda moderada por José A. García Naya, director do Cufie.

O debate centrouse na posta en común das principais ideas e experiencias relatadas nas videocomunicacións presentadas e tamén, supuxo unha ocasión perfecta para compartir as inquedanzas, éxitos e impedimentos que a situación de emerxencia sanitaria trouxo consigo durante estes meses pasados.

Imaxe da mesa redonda

Os obradoiros

Durante a mañá do día 28 de maio, tiveron lugar os catro obradoiros que denominamos “Laboratorios de retos”, pois estiveron organizados en torno a un reto que as persoas asistentes debían resolver por grupos coa axuda do profesorado experto encargado de cada obradoiro.

A continuación podedes ver unha pequena galería con fotos do desenvolvemento de cada un deles:

• 

• 

• 

• 

Os premios

Convocáronse dous premios á mellor experiencia de adaptación á docencia virtual: o 1º premio, dirimido por un xurado externo de expertos e o 2º premio, que decidían os propios participantes a través dos seus votos. A emoción sobre o primeiro premio mantívose ata o final e o xurado tivo bastante difícil a decisión.

Finalmente, resultou gañadora a experiencia “Nonna, mi racconti…”: historias de una influencer nonagenaria en el aprendizaje del italiano da profesora Emiliana Tucci. O segundo premio estivo moi reñido, pois ás 15:00 horas do día 27 ían empatadas a puntos dúas experiencias. Para desempatar, decidiuse acudir ás puntuacións do xurado externo resultando gañadora do 2º premio a experiencia “A Universidade Sénior: Derribando barreiras e estereotipos en tempos de COVID” das profesoras Ana I. Ares Pernas, Susana Iglesias Antelo e Matilde García Sánchez. Sen embargo, a vicerreitora Nancy Vázquez quixo premiar tamén á outra experiencia que quedou ao mesmo nivel de puntos concedéndolle un accésit. Trátase da experiencia “Metodologías activas en la formación inicial del profesorado en orientación, tutoría y diagnóstico” das profesoras Nuria Rebollo Quintela, Paula Mendiri Ruíz de Alda e Luisa Losada Puente.

Deixámosvos algunhas fotos do acto de entrega de premios, así como tamén a gravación que vos recomendamos visualizar se non puidestes no seu momento porque foi moi divertida e emotiva.

• 

  Medallas

• 

  Entrega do 2º premios, con Matilde García, directora da Sénior

• 

  Entrega do accésit coa profesora Luisa Losada

• 

  Emiliana Tucci, gañadora do 1º premio

• 

  Susana Iglesias, Matilde García e Ana Ares, gañadoras do 2º premio

• 

  Nuria Rebollo, Paula Mendiri e Luisa Losada, gañadoras do accésit

Vídeo da entrega de premios e clausura das V Xornadas de Innovación Docente

As valoracións

Tal como afirmou a vicerreitora Nancy Vázquez na súa presentación, co esforzo e dedicación de todos e todas conseguimos facer posible o que parecía imposible.

Sen dúbida nunca deixaremos de ser unha universidade presencial, pero esta crise sanitaria marcou un antes e un despois na nosa actividade académica. Bo reflexo disto é a boa acollida que tiveron estas xornadas mesmo usando exclusivamente formatos dixitais, o cal denota que definitivamente perdemos o medo ao uso de novas ferramentas e de novos contextos de aprendizaxe.

Deixámosvos cos resultados da enquisa de valoración e dámosvos as grazas un ano máis pola vosa participación e o voso interese. Agardámosvos nunha próxima edición, de seguro menos condicionada pola pandemia e en formato híbrido ou mixto, segundo a preferencia maioritaria que denotan os resultados da enquisa.

resultados-enquisa-valoracionvxidDescarga

A nova normalidade académica: leccións aprendidas e retos de futuro

Baixo este lema tan significativo da era que estamos a vivir celebraremos os próximos 27 e 28 de maio a V edición das Xornadas de Innovación Docente na UDC.

Cartaz das V Xornadas de Innovación Docente

Vai ser unha edición moi especial e moi diferente ás anteriores, non só porque será totalmente virtual e con participación a través de vídeo-comunicacións, senón porque os participantes xa non somos os mesmos como docentes nin como alumno/as logo desta adaptación forzosa ao ensino en remoto. Querendo ou non, vímonos na obriga de adaptarnos e de aprendermos axudándonos uns a outros para superar os numerosos obstáculos que nos foron aparecendo nese tortuoso camiño. Por iso, porque cada un de nós ten moreas de experiencias que contar, estas xornadas van ser máis interesantes ca nunca.

Son moitas pois as leccións aprendidas e agora toca poñelas en común para non deixar de aprender e para compartir éxitos, fracasos e preocupacións polo futuro.

Pola nosa banda, preparamos un encontro distinto, onde a vosa voz como participantes teña pleno protagonismo a través de participacións en vídeo e de mesas redondas. Ademais, deseñamos un laboratorio de retos onde vos enfrontaredes por grupos, poñéndovos na pel de auténticos alumnos virtuais, á resolución de catro retos relacionados coa docencia virtual lanzados por algúns dos nosos mellores docentes dos que, de seguro, aprenderedes moito.

• Dinamizando as nosas clases virtuais síncronas. Thais Pousada e Laura Nieto
• Deseñando materiais didácticos accesibles. Iago Santalla
• Diversificando a avaliación. Juan Carlos Brenlla
• Guión audiovisual para vídeos educativos. Manuel García Torre

Teremos a sorte de contar con unha poñente de excepción para a conferencia plenaria: Sonia Arranz Turnes, a directora de eCampus, a unidade de asesoría e soporte para a formación online da Universidade de Deusto. Elixímola a ela porque é unha persoa con un coñecemento e unha experiencia moi acreditada no campo do e-learning e tamén porque estar á fronte de eCampus durantes estes meses, outorgoulle unha visión de 360º sobre as dificultades ás que se enfrontaron tanto docentes como alumnos como PAS no proceso de transformación da docencia e da aprendizaxe.

Sonia Arranz Turnes

Outra novidade desta edición é que a Vicerreitoría de Planificación Académica e Innovación Docente quere premiar a dedicación e o esforzo do profesorado mediante a concesión de dous premios ás mellores experiencias de adaptación á docencia en remoto presentadas a través das video-comunicacións. Haberá un primeiro premio dirimido por unha comisión de expertos externa e un segundo premio outorgado polos votos do público aos vídeos (podes ver as bases aquí)

Animádevos a participar! agardámosvos a todos e todas!

Contextos Universitarios Transformadores. Publicado o 2º número da colección

Acaba de saír á luz, baixo o lema “Construíndo espazos de aprendizaxe”, o segundo número da colección Contextos Universitarios Transformadores (CUT) .

O novo número agrupa un total de 34 comunicacións e 20 posters que foron presentados no marco das III Xornadas de Innovación da UDC celebradas o pasado mes de novembro de 2018.

Nesta edición atoparedes interesantísimas achegas de propostas innovadoras desenvolvidas nas aulas da UDC, que xiran en torno a 4 liñas temáticas principais:

• Aplicación educativa das Tecnoloxías da Información e da Comunicación (TIC)
• Metodoloxías Activas e Recursos para a avaliación
• Impulso da Responsabilidade Social Universitaria

• Xestión de centros e Colaboración entre docentes

Pincha  aquí ou na imaxe para acceder ao libro

Confiamos en que esta iniciativa sexa de utilidade tanto para a aprendizaxe e a formación do profesorado universitario como para abrir as nosas aulas á sociedade en prol do coñecemento e dunha formación universal e aberta.

Desde o CUFIE queremos dar as grazas ao profesorado da Universidade da Coruña pola súa implicación e o seu esforzo pola mellora contínua, tanto dos procesos de aprendizaxe do seu alumnado como da súa propia práctica docente.

 

 

Álbum do Premio Innovación MiríadaX

Como sabedes, o pasado martes 22 acudimos a Madrid á gala de entrega de premios Innovación MiríadaX logo de quedar entre os 10 finalistas ao mellor MOOC do ano co curso “Música para el siglo XXI: aportaciones del software libre a la educación musical”. Este curso, deseñado e impartido en colaboración coa Universidade de Cádiz, foi seleccionado entre máis de 89 candidaturas de 8 países diferentes. Para nós, que acabamos de iniciarnos neste mundo da formación aberta e masiva, estar aí entre os mellores era de por si un auténtico premio ao esforzo e ao traballo de tantos meses.

Desde a idea inicial, que partiu de dúas profesoras que son un exemplo de constancia e tesón – Rocío Chao e Sara Román- ata o producto final, houbo un longo camiño de procura de medios materiais e humanos, de trámites burocráticos e de horas, moitas horas de traballo por parte dos equipos docentes e técnicos de ambas universidades. Desde logo, todos e todas coincidimos en algo: mereceu moito a pena.

Para que vos fagades unha idea rápida da visibilidade que estes cursos outorgan á nosa universidade aquí vos deixamos un mapa co número de inscritos por países:

En definitiva, acudimos a Madrid a profesora Rocío Chao e mais eu, a técnica de teleformación do CUFIE, acompañadas do vicerreitor de Economía, Domingo Calvo en representación da Universidade da Coruña. Alí tivemos ocasión de coñecer persoalmente ao equipo de profesionais de MiríadaX, aos que temos que agradecer profundamente a súa amabilidade e dedicación, así como tamén ao resto de finalistas de outras universidades tanto nacionais como internacionais. Aínda que, como dicía, para nós ese xa foi de por si un premio, resultamos agraciados con un dos catro recoñecementos que figuraban nas bases da convocatoria.

E, como non todo ía ser traballar, tamén fomos convidados a un estupendo almorzo na propia sede de MiríadaX. Unha honra que esperamos repetir en edicións posteriores e… por que non? aspirar a gañar o primeiro premio!

Publicada a I Convocatoria de Grupos de Innovación Educativa da Universidade da Coruña

Inauguramos curso académico con unha nova iniciativa que, sen dúbida, será de grande interese para o noso profesorado e para o persoal investigador: a Vicerreitoría de Oferta Académica e Innovación Docente, en colaboración co CUFIE, acaba de lanzar unha convocatoria para a constitución e recoñecemento de Grupos de Innovación Educativa (GIE).

Os obxectivos que se perseguen son os seguintes:

• Promover a participación do profesorado en accións de innovación educativa.
• Fomentar o traballo colaborativo e interdisciplinar mediante asociacións estables de profesores que favorezan a actualización permanente e o desenvolvemento profesional docente.
• Darlles unha maior proxección e difusión ás actividades de innovación educativa da UDC para adquirir unha maior presenza nos foros educativos nacionais e internacionais.
• Mellorar o impacto dos procesos de ensino-aprendizaxe e, en xeral, a calidade do ensino impartido na UDC.

Todos os detalles desta convocatoria pódense consultar na sede electrónica da UDC e nesta ligazón á nosa web: http://www.udc.es/cufie/INNOVACION/GIE/IConvocatoria.html 

Como avance, deixámosvos aquí recollidas na seguinte infografía as 5 cuestións clave sobre os GIE. Esperamos que sexa un éxito!

Docentes conectad@s: o reto de educar na era dixital

Docentes contectad@s: o reto de educar na era dixital é o título do curso de verán organizado polo CUFIE que se vai celebrar os días 10 e 11 de xullo na Facultade de CC. da Educación do campus de Elviña.

A nosa intención foi crear un punto de encontro, unha ocasión para reunir a docentes de niveis educativos diferentes para debater, poñer en común ideas e proxectos e crear sinerxias que lles permitan traballar xuntos arredor dos novos paradigmas educativos que están a xurdir no contexto da era dixital e conectar as aulas coas necesidades dunha sociedade en permanente cambio.

Titulámolo Docentes conectad@s para facer fincapé na necesidade de establecer conexións e de tecer fíos entre os distintos actores implicados na construción dunha educación de calidade:

• Conexión das aulas con unha sociedade cambiante que esixe unha actualización permanente das metodoloxías e das ferramentas coas que se densenvolve a docencia.
• Conexión do/as docentes entre sí, porque a calidade do ensino na era dixital pasa ineludiblemente polo traballo colaborativo e a creación de redes de profesionais que aprendan xuntos compartindo coñecemento.
• Conexión docentes-alumnado a través de ferramentas, estratexias didácticas e metodoloxías activas que poñan ao alumnado no centro do proceso de ensino-aprendizaxe.
• Conexión docentes-tecnoloxía educativa que posibilite a mellora e actualización da competencia dixital docente.